Yanvarın 16-da F.Köçərli adına Respublika Uşaq Kitabxanasının 2 saylı filialının əməkdaşları 265 saylı tam orta məktəbin III sinif şagirdləri ilə birgə Şəhidlər Xiyabanını ziyarət etdilər. Şəhid məzarları önünə tər qərənfillər qoyuldu. Kitabxana əməkdaşı, uşaqlarla söhbətində Qanlı Yanvar gününü ağır gün adlandırmaqla yanaşı, həm də bu günü tariximizin şərəfli səhifələrindən biri hesab etdiyini vurğuladı. 20 Yanvar xalqımızın Ümumxalq Hüzn Günü olmaqla yanaşı, həm də milli qürur günümüzdür. 1990-cı ilin yanvar qırğını nə qədər faciəli olsa da, Azərbaycan xalqının iradəsini, azadlıq uğrunda mübarizə əzmini qıra bilmədi. Həmin gecədə həlak olan vətən oğulları, Azərbaycanın tarixinə parlaq səhifə yazdılar, xalqın milli azadlığı, müstəqilliyi üçün yol açdılar. 

Nəsimi rayon 1 saylı Uşaq- Gənclər İnkişaf Mərkəzi ilə F.Köçərli adına Respublika Uşaq Kitabxanasının əməkdaşları 20 Yanvar  faciəsi ilə bağlı uşaqlarla "20 Yanvar- xalqımızın qəhrəmanlıq salnaməsi"  adlı tədbir keçirdilər.  Tədbirdə vətənpərvərlik mövzusunda şeirlər səsləndi, muğam ifa olundu. Tədbir iştirakçıları əməkdaşların hazırladığı kitab və rəsm sərgisi ilə tanış oldular.