3 noyabr tarixində Respublika Uşaq Kitabxanasında 88 nömrəli məktəbin VI sinif şagirdlərinin iştirakı ilə görkəmli şair, Azərbaycan ədəbiyyatının tanınmış nümayəndəsi Fikrət Qocanın həyat və yaradıcılığına həsr olunmuş tədbir keçirilib.

Tədbir kitabxana əməkdaşının Fikrət Qocanın həyatı və yaradıcılığı barədə qısa məlumat təqdim etməsi ilə başlayıb. Qeyd olunub ki, Fikrət Qoca Azərbaycan poeziyasının inkişafında mühüm xidmətləri olan, dərin mənalı, vətənpərvərlik ruhlu şeirləri ilə oxucuların qəlbində xüsusi yer tutan ədiblərimizdəndir.

Daha sonra aparıcılar şairin yaradıcılığı haqqında ətraflı məlumat verərək onun ədəbi irsindən nümunələr səsləndiriblər. Tədbir iştirakçıları Fikrət Qocanın poeziyasında Vətən sevgisi, insanpərvərlik, mənəvi dəyərlər və səmimiyyət kimi mövzuların mühüm yer tutduğunu vurğulayıblar.

Tədbirin davamında məktəblilər növbə ilə Fikrət Qocanın şeirlərini səsləndirib, sevilən poetin bədii yaradıcılığına olan rəğbətlərini ifadə ediblər. Daha sonra şagirdlərin biliklərini möhkəmləndirmək məqsədilə şairin həyatı və yaradıcılığı ilə bağlı sual-cavab mərhələsi təşkil olunub. 

Sonda isə iştirakçılara Fikrət Qocanın həyat və yaradıcılığını əks etdirən videoçarx təqdim olunub. Videoçarxda şairin ömür yolu, yaradıcılıq fəaliyyəti, oxucular tərəfindən sevilən poetik nümunələri və ədəbi mühitdə qoyduğu silinməz izlər əks etdirilib.

Tədbirin əsas məqsədi şagirdlərdə ədəbiyyata marağı artırmaq, görkəmli söz ustadlarının yaradıcılığını tanıtmaq və milli-mənəvi dəyərlərin təbliğinə töhfə vermək olub.