6 noyabr 2026-cı il tarixində F. Köçərli adına Respublika Uşaq Kitabxanasında Bakı şəhəri Humanitar fənlər təmayüllü liseyin şagirdlərinin iştirakı ilə 8 Noyabr – Zəfər Gününə həsr olunmuş “Zəfər günəşinin işığında”adlı tədbir keçirilib.

Tədbirdə şagirdlərə 8 Noyabr – Zəfər Günü, 44 günlük Vətən müharibəsində Azərbaycan Ordusunun göstərdiyi qəhrəmanlıq, xalqımızın birliyi və həmrəyliyi, eləcə də Şuşa şəhərinin azad olunmasının tarixi əhəmiyyəti haqqında ətraflı məlumat verilib. Həmçinin, şagirdlər vətənə, torpağa, qəhrəmanlığa və Zəfərə həsr olunmuş şeirlər səsləndiriblər.

Təqdimatlardan sonar Zəfərə həsr olunmuş kitabların icmalı diqqətə çatdırılıb. Kitabxana əməkdaşı Zəfər tariximizə, Vətən müharibəsinə, qəhrəman Azərbaycan əsgərinin şücaətinə və milli-mənəvi dəyərlərimizə həsr olunmuş kitablar haqqında məlumat verib. Şagirdlərə tariximizi daha dərindən öyrənmək, qəhrəmanlıq salnaməmizi yaşatmaq və mütaliəyə marağı artırmaq baxımından bu nəşrlərin əhəmiyyəti izah olunub.

Tədbirin davamında iştirakçılar mövzuya uyğun hazırlanmış videçarx izləyiblər. Videomaterialda Vətən müharibəsinin tarixi anları, Azərbaycan xalqının həmrəyliyi, ordumuzun qəhrəmanlığı və qazanılmış tarixi Zəfərin əhəmiyyəti əks olunub.

Belə tədbirlərin keçirilməsi şagirdlərin tarixi biliklərinin artırılması, milli-mənəvi dəyərlərə bağlılığının gücləndirilməsi, vətənpərvərlik hisslərinin formalaşdırılması və gənc nəslin mütaliəyə təşviq edilməsi baxımından mühüm əhəmiyyət daşıyır.

Tədbirin əsas məqsədi şagirdlərə Azərbaycanın şanlı Zəfər tarixini, Vətən müharibəsinin tarixi əhəmiyyətini və Dövlət Bayrağımızın milli kimliyimizin rəmzi kimi daşıdığı mənanı aşılamaq, gənc nəslin vətənpərvərlik ruhunda tərbiyəsinə töhfə vermək olub.