1 İyun – Uşaqların Beynəlxalq Müdafiəsi Günü münasibətilə Azərbaycan Respublikası Mədəniyyət Nazirliyinin təşkilatçılığı ilə Dənizkənarı Milli Parkda uşaqlar üçün genişmiqyaslı bayram tədbiri keçirilib. “Dinamo” meydanında baş tutan rəngarəng tədbir uşaqlara unudulmaz anlar yaşadıb.
Bayramda təşkil olunan Uşaq İncəsənət Festivalı çərçivəsində istedadlı uşaqların çıxışları tamaşaçılar tərəfindən böyük maraqla qarşılanıb. Festival ərazisində qurulmuş interaktiv zonalar, əyləncə guşələri, yaradıcı emalatxanalar, əl işləri sərgiləri və qiraət məkanları uşaqların həm əylənməsi, həm də öyrənməsi üçün əlverişli şərait yaradıb.
Tədbirdə Respublika Uşaq Kitabxanası maraqlı və maarifləndirici təqdimatlarla fəal iştirak edib. Uşaqlarda kitaba və mütaliəyə maraq yaratmaq məqsədilə qiraət pavilyonunda təşkil olunan ənənənəvi kitab sərgisi və qiraət saatları uşaqların marağına səbəb olub. Tədbirin açılışında pavilyonda iştirak edən uşaqlar Azərbaycan Dövlət himnini qürurla canlı ifa ediblər. Açıq havada təşkil edilən bu təşəbbüs uşaqların oxu vərdişlərinin formalaşmasına və ədəbiyyata maraqlarının artmasına xidmət edib. Balaca oxucular sərgilənən nəşrlərlə tanış olaraq, seçdikləri kitabları yerindəcə mütaliə ediblər.
Tədbir çərçivəsində keçirilən “Türk dünyasının Bəxtiyarı” adlı şeir müsabiqəsinin qalibləri də elan edilib və mükafatlandırılıb. Yüksək yaradıcılıq bacarığı, poetik düşüncəyə və uğurlu komanda işinə görə I-ci yerə 3 nömrəli UGİM-nin üzvləri Yusif Allahverdiyev və Cəmilə İbrahimli, II-ci yerə 49 nömrəli orta məktəbin 5-ci sinif şagirdi – Xaləddin Səfərli, III-cü yerə isə 187 nömrəli orta məktəbin 10-cu sinif şagirdi Nihat Quliyev layiq görülüblər.
Qiraət saatlarında uşaq yazarı Solmaz Amanova şeirləri, interaktiv oyunları, animasiyaları ilə xüsusi fəallıq göstərib.
Tədbirin əsas məqsədi uşaqların hüquqlarının müdafiəsi və onların hərtərəfli inkişafına dəstək vermək olub.
