14 iyun tarixində F.Köçərli adına Respublika Uşaq Kitabxanasında 15 İyun - Milli Qurtuluş Günü ilə bağlı tədbir keçirilib. Tədbir Azərbaycan Respublikasının Dövlət Himninin səsləndirilməsi ilə başlanıb. Tədbirdə 70 nömrəli Məktəb-Liseyinin şagirdləri iştirak ediblər. Kitabxana əməkdaşı məktəblilərə Qurtuluş Günü ilə bağlı geniş məlumat verib. O qeyd edib ki, iyunun 15-i xalqımız üçün əsl qurtuluş tarixi və bu tarixi yaradan isə Azərbaycanın müstəqilliyinin qorunub saxlanmasında, möhkəmlənməsində, inkişafında müstəsna rol oynayan, daim xalqına arxalanan və xalqına arxa, dayaq olan Ümummilli Lider Heydər Əliyevdir. İyunun 15-də Heydər Əliyev Azərbaycan Ali Sovetinin sədri seçilib. Ulu Öndər böyük risklərə baxmayaraq, xalqın qurtuluşu missiyasını cəsarətlə öz üzərinə götürüb.
Ulu Öndər Heydər Əliyevin hakimiyyətə qayıdışından sonra ölkədə baş vermiş sosial-iqtisadi və siyasi inkişaf dövlətimizin möhkəmlənməsində, sivil dünyaya sıx inteqrasiya prosesinə qoşulmasında və xalqımızın strateji mənafelərini təmin edən modern cəmiyyətin qurulmasında həlledici rol oynayıb. Beləliklə, bu mühüm tarixi gün xalqımızın yaddaşına Milli Qurtuluş Günü kimi həkk oldu və 1997-ci ildən etibarən parlamentin qərarı ilə rəsmi bayram kimi qeyd edilib.
Tədbirin sonunda məktəblilər Zahirə Cabirin Ulu Öndərə həsr olunan “Ana laylası” slaydını izləyib.