Aprelin 30-da, Firidun Bəy Köçərli adına Respublika Uşaq Kitabxanasında böyük Azərbaycan şairi, mütəfəkkir İmadəddin Nəsiminin 650 illik yubileyinə həsr olunmuş “İlahi nitqin tərcümanı” adlı tədbir keçirildi. Tədbirdə, Azərbaycan şairi İmadəddin Nəsiminin 650 illik yubileyinin qeyd edilməsi haqqında Azərbaycan Respublikası Prezidenti cənab İlham Əliyevin imzaladığı sərəncam tədbir iştirakçılarının diqqətinə çatdırıldı. Tədbir çərçivəsində, kitabxana əməkdaşları və təcrübəçi tələbələrin təqdimatında, Nəsimi yaradıcılığından: “Ayrılır”, “Mənəm, mən”, “Neylərəm”, “Ağrımaz” və “Sığmazam” qəzəlləri, həmçinin, Nəsimi filmindən fraqmentlər və qəzəlləri əsasında hazırlanmış kompozisiyalar təqdim edildi. Ədibin həyat və yaradıcılığından geniş söhbət açılaraq, Azərbaycan xalqının ümumbəşər mədəniyyətinə bəxş etdiyi qüdrətli söz ustadı olduğu və Şərqin zəngin mədəni-mənəvi sərvətləri üzərində ucalıb və bədii söz sənətinin son dərəcə qiymətli incilərini meydana gətirdiyi vurğulandı. Ötən əsrin 70- ci illərində Azərbaycan ədəbiyyatının görkəmli nümayəndələrindən ilk dəfə Nəsiminin 600 illik yubileyi YUNESKO- nun tədbirləri siyahısına daxil edilmiş və 1973- cü ildə beynəlxalq miqyasda qeyd olunmuşdur. Tədbirin sonunda, diskussiya keçirildi. Qeyd edək ki, tədbirin keçirilməsində əsas məqsəd, oxucuları Nəsimi yaradıcılığı və fəlsəfəsi ilə yaxından tanış etmək idi.