28 noyabr 2018- ci il tarixində, F.Köçərli adına Respublika Uşaq Kitabxanasının əməkdaşları Tahir Salahovun 90 illik yubileyi münasibəti ilə Bakıda “İçərişəhər” Dövlət Tarix-Memarlıq Qoruğunda görkəmli rəssamın ev muzeyinə ekskursiya etdilər. Müasir Azərbaycan rəssamlıq məktəbinin görkəmli nümayəndəsi Tahir Salahov milli incəsənət xəzinəsinin qızıl fonduna daxil olan əsərləri ilə Azərbaycan mədəniyyəti tarixində əhəmiyyətli iz qoyub. Ev-muzeyində Tahir Salahovun Azərbaycan dövlətinə bağışladığı rəsm əsərlərindən və şəxsi arxivindən ibarət kolleksiya nümayiş olunur. Muzeyin kolleksiyasında 798 eksponat var. Beş il əvvəl Prezident İlham Əliyevin müvafiq Sərəncamına əsasən yaradılmış Tahir Salahovun ev-muzeyi öz qapılarını ictimaiyyət üçün açaraq İçərişəhərin əsas incəsənət və mədəniyyət mərkəzlərindən birinə çevrilib. Bir sıra ölkələrdən turistlər məhz dahi sənətkarın ev-muzeyini ziyarət etmək üçün bura gəlir. Tahir Salahov milli sənət xəzinəsinin qızıl fonduna daxil olan əsərləri ilə Azərbaycan mədəniyyəti tarixində parlaq səhifə açmışdır. Onun dünyanın mötəbər muzeylərində və qalereyalarında saxlanılan, müxtəlif sərgilərdə nümayiş etdirilən tabloları çoxəsrlik ənənələrə malik Azərbaycan incəsənətinin şöhrətini yüksəklərə qaldırıb. Rəssamın yaratdığı tabloları izlədikcə bir daha əmin olursan ki, sənətkar əsərlərini kətan üzərinə həkk edərkən sadəcə göz oxşayan, cəlbedici görünüşə üstünlük vermir. Daha çox əsərinin fəlsəfə ideologiyasının tamaşaçı tərəfindən ifadə olunduğu kimi qavramasına üstünlük vermişdir. Kitabxanaçılar rəssamın yaradıcılıq dövrünün ən dəyərli əsərləri və onların tarixçəsi haqqında məlumatlandılar. Onlar rəssamın kolleksiyalarına, fotoarxivinə, müxtəlif rəsm əsərlərinə maraqla tamaşa etdilər. Füsünkar əsərlərin, milli eksponatların gözəlləyi kitabxanaçıların zövqlərini oxşadı.