3 aprel 2026-cı il tarixində Dövlət Tibbi-Sosial Ekspertiza və Reabilitasiya Agentliyinin 2 nömrəli Uşaq Reabilitasiya Mərkəzində F.Köçərli adına Respublika Uşaq Kitabxanasının 2 saylı filial əməkdaşları tərəfindən 2 aprel – Beynəlxalq Uşaq Kitabı Günü münasibətilə tədbir təşkil olunub.

Tədbir çərçivəsində görkəmli danimarkalı yazıçı Hans Kristian Andersenin kitablarından ibarət sərgi təşkil edilib. Əvvəlcə kitabxana əməkdaşları tərəfindən əlamətdar günün əhəmiyyəti barədə məlumat verilib, daha sonra videoçarx nümayiş olunub və yazıçının həyat və yaradıcılığına nəzər salınıb. Bildirilib ki, dünya ədəbiyyatı tarixinin görkəmli nağıl ustası Andersenin əsərləri mövzu baxımından zəngin və çoxşaxəlidir. Onun yaradıcılığı ədəbi möcüzə kimi dəyərləndirilir və uşaq ədəbiyyatının inkişafında mühüm rol oynayır. Qeyd olunub ki, Andersenin nağılları təkcə uşaqlar deyil, böyüklər tərəfindən də maraqla oxunur. 

Daha sonra uşaqlar sərgidə nümayiş olunan kitablarla tanış olub, onlara müxtəlif mövzularda nağıllar oxunub. Eyni zamanda yazıçının əsərləri əsasında hazırlanmış cizgi filmləri nümayiş etdirilib.

Tədbirin məqsədi xüsusi qayğıya ehtiyacı olan uşaqların sosiallaşmasına dəstək olmaq, onların fərdi qabiliyyət və maraqlarına uyğun inkişafına şərait yaratmaq, eləcə də uşaqlarda kitaba və mütaliəyə sevgi aşılamaqdan ibarət olub.