17 aprel 2026-cı il tarixində Respublika Uşaq Kitabxanasında yazıçı, psixoloq İlqar Kamil ilə gənclərin maraqlı və maarifləndirici görüşü baş tutub.

Tədbiri giriş sözü ilə açan kitabxananın direktoru Şəhla Qəmbərova qonaq haqqında ətraflı məlumat verərək onun yaradıcılığı və ədəbiyyata verdiyi töhfələrdən bəhs edib. Görüş əsasən gənclərin psixoloji inkişafı, oxu vərdişlərinin formalaşdırılması və yaradıcı düşüncə qabiliyyətlərinin artırılması mövzularına həsr olunub.

Tədbir zamanı İlqar Kamil çıxışında insan iradəsinin gücü, psixoloji dayanıqlılığın formalaşdırılması və həyatda məqsədyönlü şəkildə irəliləməyin vacibliyini xüsusi vurğulayıb. O qeyd edib ki, hər bir insan öz üzərində davamlı işləməklə daxili potensialını üzə çıxararaq “xüsusi təyinatlı qüvvə”yə çevrilə bilər. Yazıçı şəxsi təcrübələrini bölüşərək gəncləri öz düşüncələrini sərbəst ifadə etməyə, mütaliəyə daha çox vaxt ayırmağa və yazı fəaliyyətinə maraq göstərməyə çağırıb.

Görüş interaktiv formatda davam edib, tələbələri maraqlandıran suallar cavablandırılıb, onlara yaradıcılıq potensiallarının inkişafı ilə bağlı praktik tövsiyələr verilib. Bu dialoq mühiti gənclərin həm özünüifadə bacarıqlarının, həm də analitik düşüncə tərzinin inkişafına müsbət təsir göstərib.

Görüşün yekununda İlqar Kamil müəllifi olduğu, şəhid leytenant Murad Nağıyevin xatirəsinə həsr edilmiş “9-cu Mərtəbə” adlı kitabını kitabxanaya və tələbələrə hədiyyə edib. Bu kimi görüşlər gənclərin intellektual və emosional inkişafında mühüm rol oynayır. Xüsusilə psixoloji ədəbiyyat gənclərə özünü dərk etmə, emosiyaları idarə etmə və həyat məqsədlərini düzgün müəyyənləşdirmə baxımından güclü dəstək verir. Belə təşəbbüslər onların həm fərdi inkişafına, həm də cəmiyyətə daha hazırlıqlı və düşüncəli fərdlər kimi formalaşmasına xidmət edir.