17 oktyabr 2025-ci il  F.Köçərli adına Respublika Uşaq Kitabxanasında tanınmış uşaq yazıçısı Gülzar İbrahimova ilə görüş keçirilmişdir. Görüşdə 1 nömrəli Ümumi Təyinatlı İnternat Tipli Ümumtəhsil Məktəbinin şagirdləri iştirak etmişlər.

Tədbirin açılışında kitabxananın əməkdaşı iştirakçıları salamlayaraq, yazıçı  barədə məlumat vermiş, eyni zamanda Gülzar İbrahimovanın uşaq ədəbiyyatına verdiyi töhfələrdən bəhs etmişdir. Bildirilmişdir ki, yazıçının əsərləri uşaqlarda mütaliə marağını artırmaqla yanaşı, onların mənəvi-estetik inkişafına da töhfə verir. Müəllifin kitabxana fondunda yer alan digər kitabları barədə də qısa təqdimat edilmişdir.

Görüş zamanı Gülzar İbrahimova uşaqlar üçün qələmə aldığı bir sıra ədəbi nümunələri təqdim edərək, onların məzmunu və tərbiyəvi əhəmiyyəti barədə fikirlərini bölüşmüşdür. Şagirdlər yazıçının “Sirus və Virusun macəraları”, “Qızıl balığın arzusu” kimi əsərləri ilə yaxından tanış olmuş, bu əsərlər əsasında interaktiv sual-cavab formatında maraqlı müzakirələr aparılmışdır. Yazıçı uşaqları maraqlandıran sualları cavablandırmış, eyni zamanda əsərlərində işlədiyi mövzular və onların uşaqların dünyagörüşünə təsiri haqqında ətraflı məlumat vermişdir.

Tədbirin davamında kitabxana əməkdaşları tərəfindən uşaqlara müxtəlif ədəbiyyat nümunələri təqdim olunmuş, onların maraq dairəsinə uyğun kitabların seçilməsi və mütaliə vərdişlərinin formalaşdırılması ilə bağlı tövsiyələr verilmişdir.

Yazıçı ilə görüşün əsas məqsədi uşaqların ədəbiyyata olan marağını artırmaq, mütaliə vərdişlərini inkişaf etdirmək, eyni zamanda onların yaradıcı düşüncə bacarıqlarına dəstək göstərməkdən ibarət olmuşdur.