1 noyabr tarixində Respublika Uşaq Kitabxanasının təşkilatçılığı ilə Xətai Sənət Mərkəzində “8 noyabr Zəfər Günü”nə həsr olunmuş “Kiçik Ürəklərdə Zəfər Rəngləri” adlı uşaq və yeniyetmələrin rəsm və əl işlərinin sərgisi baş tutub.
Sərginin təşkilində əsas məqsəd 7-17 yaş arası uşaq və yeniyetmələrdə hərbi vətənpərvərlik ruhunun yüksəldilməsi, gənclərə milli həmrəylik və qəhrəmanlıq dolu ülvi hisslərin aşılanması, Vətənimizin suverenliyi uğrunda Azərbaycan əsgərinin döyüş rəşadəti və şəhidlərimizin xatirəsini əbədiləşdirmək, milli-mənəvi dəyərlərimizi təbliğ etməklə Qarabağın zəngin tarixi və mədəniyyət abidələrini uşaq və yeniyetmələrə tanıtdırmaq, istedadlı uşaqları üzə çıxarmaq, eləcə də yaradıcılıq qabiliyyətlərini inkişaf etdirməkdir.
Sərgidə əbədi və əzəli Azərbaycan torpaqlarını, Şuşa, Xudafərin körpüsü, zəfərimizin nişanəsi olan üç rəngli bayrağımızı, xarıbülbülü, qəhrəman əsgərlərimizi özündə əks etdirən 80 dən çox rəsmlər və əl işləri nümayiş olunub. Sərgi çərçivəsində 201, 144 saylı tam orta məktəb, 43, 49 saylı lisey, 3 və 5 nömrəli Uşaq – Gənclər İnkişaf Mərkəzi, Azərbaycan Respublikası Gəncliyə Yardım Fondu, İncəsənət Gimnaziyası uşaqlarının rəsmləri və Zəngi liseyi 4a sinif şagirdlərinin əl işləri təqdim edilib.
Sərgidə Xalq rəssamı Arif Hüseynov, Respublika “Xatirə kitabı” redaksiyasının baş redaktoru Nəzakət Məmmədova, 3 nömrəli Uşaq-Gənclər İnkişaf Mərkəzinin diroktoru Lalə Qəti, şair-publisist Rəfael Tağızadə, 5 nömrəli Uşaq-Gənclər İnkişaf Mərkəzinin direktoru Elza Orucova və Vətən müharibəsi qaziləri iştirak ediblər.
F. Köçərli adına Respublika Uşaq Kitabxanasının direktoru Şəhla Qəmbərova çıxış edərək 44 günlük Zəfər tarixini tərənnüm edən istənilən layihənin, tədbirlərin, kitab təqdimatlarının, sərgilərin, müsabiqələrin və digər layihələrin keçirilməsinin böyük şərəfli bir missiya olduğunu bildirib və bu kimi tədbirlərin Azərbaycan əsgərinin döyüş rəşadəti və şəhidlərimizin əziz xatirəsini əbədiləşdirməklə gənc nəslin tərbiyə olunmasında qəhrəmanlarımızın həyatlarının örnək olduğunu bildirib. O qeyd edib ki, torpaqlarımızın azadlığı uğrunda şəhadətə ucalan bütün qəhrəman oğullarımız daim Azərbaycan xalqının qəlbində yaşayacaq, onların göstərdikləri qəhrəmanlıq tarixdə əbədi qalacaq.
Sərgi çərçivəsində 5 saylı Uşaq - Gənclər İnkişaf Mərkəzinin dərnək üzvləri musiqi nömrələri ilə çıxış ediblər.
Sonda Azərbaycan Dövlət Akademik Milli Dram Teatrı və Azərbaycan Gənc Tamaşaçılar Teatrı tədbirə dəstək məqsədilə iştirakçı uşqlara “Zəfər yolu” və “Sinbad” tamaşalarına bilet hədiyyə etdilər.
