3 aprel tarixində Respublika Uşaq Kitabxanasında 144 və 30 saylı tam orta məktəb şagirdlərinin   uşaq yazarı Mehriban Nağıyeva ilə  görüşü keçirilib.

İlk öncə məktəblilər  kitabxanada təşkil olunmuş  ənənəvi kitab sərgisi ilə  tanış olub. Sərgi ətrafında uşaqlara kitablar haqqında məlumat verilib, dünyagörüşlərinin formalaşmasında kitabın xüsusi əhəmiyyəti qeyd edilib. Daha sonar kitabxananın oxu zalında şagirdlərin təqdimatında yazıçı Mehriban Nağıyevanın “Lovğa tülkü”, “Paxıl toyuq” nağılları əsasında hazırlanmış kompozisiya  təqdim olunub. 

Müəllif  uşaqların kompozisiyanı yüksək səviyyədə hazırladıqlarını və təqdim etdiklərini, çox gözəl nitq qabiliyyətinə malik olduqlarını söyləyib.

 Yazdığı nağıl və hekayələrində hər zaman vətənpərvərlik, vətən torpağına, millətə sədaqət hisslərini oxucularına aşılayan Mehriban Nağıyeva  yeni nəşr olunmuş “Sunayın rəng dünyası” kitabından “Zəfər nəğməsi”, “Xarıbülbül” şeirlərini şagirdlər üçün   səsləndirib.

Tədbirin sonunda, uşaqların hər birinə yazıçının imzaladığı nağıl kitabları hədiyyə edilib, xatirə şəkilləri çəkilib.