29 oktyabr 2021-ci il tarixdə F.Köçərli adına Respublika Uşaq kitabxanasının təşkilatçılığı ilə Bakı şəhəri, Nizami rayonu Yuri Kovalyov adına 229 saylı tam orta məktəbdə uşaqların sevimli yazarı Mehriban Nağıyeva ilə görüş keçirildi.

Tədbirdə məktəbin 4-cü sinif şagirdlərinin ifasında yazıçının “Əsmərin sehrli zənbili” nağılı əsasında hazırlanmış nağıl-tamaşa təqdim olundu. Sonra uşaqlar M.Nağıyevanın “Uşaqların şeir payı” adlı kitabından “Şuşa”, “Qarabağ”, “Armud”, “Balqabaq”, “Alma” və s. şeirlərini səsləndirdilər. Tədbirdə çıxış edən kitabxananın direktoru, Əməkdar mədəniyyət işçisi Şəhla Qəmbərova və uşaq yazarı Mehriban Nağıyeva tədbirin keçirilməsində əsas məqsədin uşaqlar arasında mütaliə mədəniyyəti və oxu vərdişini formalaşdırmaq olduğunu qeyd edərək, uşaqlara maraqlı kitablarla xoş mütaliə saatları arzuladı. Məktəbin rəhbərliyi tədbirin təşkilatçılarına və uşaq yazarı Mehriban Nağıyevaya öz minnətdarlığını bildirdi. Tədbir xatirə şəkillərinin çəkilişi ilə yekunlaşdı.