22 dekabr tarixində F.Köçərli adına Respublika Uşaq Kitabxanasının təşkilatçılığı ilə Xırdalan şəhər “Little Star” Məktəbəqədər Təhsil Mərkəzinin balaca fidanları ilə uşaq yazıçısı Mehriban Nağıyevanın görüşü keçirildi.

Tədbirdə məktəbəqədər uşaqların ifasında yazıçının “Xarıbülbül və Günəşin nağılı” əsasında hazırlanmış nağıl-tamaşa təqdim edildi. Sonra uşaqlar M.Nağıyevanın “Uşaqların şeir payı” kitabından “Şuşa”, “Qarabağ”, “Qış”, “Qar dənəciyi” və digər şeirlərini söylədilər.

Kitabxananın direktoru, Əməkdar mədəniyyət işçisi Şəhla Qəmbərova  tədbirdə çıxış edərək uşaqlarla yazarların görüşlərinin təşkil edilməsinin təqdirə layiq olduğunu söylədi. O bildirdi ki, görüş uşaqlar üçün yaddaqalan olacaq, məktəblilər uzun illər xoş təəssüratla bu görüşü xatırlayacaqlar. Uşaq yazarı Mehriban Nağıyeva tədbirin təşkilatçılarına öz minnətdarlığını bildirdi və tədbirdə iştirak edən hər bir uşağa “Xarıbülbül və Günəşin nağılı” kitabını öz imzası ilə hədiyyə etdi. Tədbirin keçirilməsində əsas məqsəd uşaqlar arasında mütaliə mədəniyyəti və oxu vərdişini aşılamaqdır.