F.Köçərli adına Respublika Uşaq Kitabxanasının həyata keçirdiyi tədbirlər çərçivəsində “Qonağım ol” rubrikasının növbəti qonağı Azərbaycan Yazıçılar və Jurnalistlər Birliyinin üzvü, Respublika Xatirə kitabı redaksiyasının baş redaktoru, “Yada düşdü” jurnalının təsisçisi, şairə, publisist Nəzakət Məmmədova oldu.

Vətənpərvər şairə Nəzakət Məmmədovanın qələmə aldığı əsərlərinin əksəriyyətində vətən qayəsi əsasdır.

Şairənin bugünə kimi 7 kitabı işıq üzü görmüşdür. Nəşr olunmuş “Yurd dediyim bu torpaq”, “Ömrün qatarı” kitabları vətənpərvərlik mövzusunda yazılmış şeirlərdən ibarətdir. Kitablar Türk və İngilis dillərinə də tərcümə olunaraq nəşr olunub. 

Kitabxananın “Instagram” sosial şəbəkəsi üzərindən reallaşan görüş çərçivəsində, şairə, jurnalist Nəzakət Məmmdədova hərb və vətənpərvərlik mövzusunda əsərləri, kitabları və ümumilikdə fəaliyyəti haqqında ətraflı məlumat verdi. 

O, canlı yayıma qoşulan oxucular üçün müəllifi olduğu “Ağlama, Şəhid qızı”, “Vətən, bizi bağışlama” və Azərbaycanın böyük zəfəri ilə yekunlaşan 44 günlük Vətən müharibəsindən sonra qələmə aldığı “Zəfərin mübarək, komandir oğlum!” adlı şeirlərini səsləndirdi.

Qeyd edək ki, layihənin həyata keçirilməsində əsas məqsəd oxucu və yazıçılar, şairlər, rəssamlar, rejissorlar, jurnalistlər, psixoloqlar və s. sevilən ziyalılar  arasında virtual görüşlərin keçirilməsini təmin etmək, yazıçıların yeni kitablarını oxuculara tanıdılmasına şərait yaratmaqla uşaq və yeniyetmələrin intellektual səviyyəsinin inkişafında kitabxanaların rolunu qeyd etməkdir.