İyulun 26-da Odlar Yurdu Universitetinin nəzdində fəaliyyət göstərən Müasir İnnovasiyalar Liseyində istirahət edən yay məktəbinin uşaqları F.Köçərli adına Respublika Uşaq kitabxanasının qonağı oldu. Mərdəkan Dendrarisində təşkil olunmuş Yay məktəbinin əsas məqsədi, uşaqların yay tətili dövründə keyfiyyətli təhsil imkanları yaratmaqla , əyləncəli proqramlar təşkil etmək, intellektual ,sosial uşaq və yeniyetmələr formalaşdırmaqdır. Kitabxananın əməkdaşı uşaqları kitabxana ilə tanış etdi, kitabxanada təşkil olunmuş kitab sərgiləri, elektron kitabxana ilə bağlı məlumat verdi. Uşaqlar kitabxananın bütün şöbələrində oldular, kitabların kitabxana qaydası ilə işlənməsi, oxuculara verilməsi işi ilə bağlı informasiya əldə etdilər. Məktəblilər nağıl otağında, “Balaca ev”, “Sehrli təbib” cizgi filmini izlədilər, müasir nağıllarımızı müzakirə etdilər. Balacalar kiçik oxu zalında “Danışan kitablar”la, qeyri-adi formalı – panoramalı, hissiyatlı, səhifələndikcə özü oxuyan, səsli düymələrlə idarə olunan, parçadan hazırlanmış və s. kitablarla tanış oldular. Əməkdaşlar, kitabxana ilə bağlı uşaqlara maraqlı olan bütün sualları cavablandırdılar.Yay məktəbinin uşaqları kitabxanadan xoş əhval-ruhiyyə ilə ayrıldılar.