14 may 2018-ci il tarixində, Misir Uşaq Ədəbiyyatı həftəsi çərçivəsində Misirin böyük alimi, uşaq yazarı, 400-dən çox kitabın müəllifi professor Yaqub Əl Şaruni F.Köçərli adına Respublika Uşaq Kitabxanasına təşrif buyurdu. İlk əvvəl, kitabxanın direktoru Ş.Qəmbərova qonaqları qarşılayıb salamladı. Misir Mədəniyyət Mərkəzinin müdiri Dr. Əhməd Sami Elaydi, uşaqların sevimli yazıçılarından Sevinc Nuruqızı, Aygün Bünyadzadə, Reyhan Yusifqızı, Rafiq Yusifoğlu, Elvira Məmmədlinin də, olduğu görüşdə kitabxananın yaranma tarixi və fəaliyyət istiqamətlərindən, eləcə də gerçəkləşdirilmiş layihələrdən, F.Köçərlinin “Balalara hədiyyə” kitabı haqqında geniş söhbət açıldı. Sonra, qonaq kitabxana ilə yaxından tanış oldu, kitabxanada fəaliyyət göstərən bütün şöbələrin işi ilə yaxından maraqlandı. Kitabxananın direktoru Ş.Qəmbərova qonağa kitabxana haqqında ətraflı məlumat verdi. Qonaq kitabxanadan və onun fəaliyyətindən məmnun olduğunu bildirdi. Xüsusilə uşaqlar üçün yaradılan nağıl otağı, milli adət-ənənələrimizi özündə əks etdirən guşə və dünya xalqlarının uşaq ədəbiyyatı üçün ayrılmış sərgilər qonağı valeh etdi. Sərgidə sərgilənən ədəbiyyatların müxtəlif dillərdə olmasının böyük əhəmiyyət kəsb etdiyini qonaq xüsusilə vurğuladı. Professor Yaqub Əl Şaruni Azərbaycan xalq nağıllarının qəhrəmanları ilə bağlı ətraflı məlumat əldə etdi. Sonda xatirə şəkilləri çəkildi.