28 fevral 2016-cı il tarixdə F.Köçərli adına Respublika Uşaq Kitabxanasının Nağıl otağında növbəti nağıl saatı təşkil olundu. Kitabxana əməkdaşları kiçik yaşlı oxucularla Azərbaycan şairi və mütəfəkkiri Məhəmməd Füzulinin “Meyvələrin söhbəti” əsərini müzakirə etdilər. Əvvəlcə uşaqlar xidmət şöbəsinin əməkdaşları tərəfindən hazırlanmış çarxlı slaydı izlədilər. Sonra kitabxanaçı Məhəmməd Füzuli haqqında maraqlı, qısa məlumat verdi. Uşaqlar “Meyvələrin söhbəti” əsərini səhnələşdirilmiş formada qonaqlara təqdim etdilər. Onların həyəcan dolu çıxışlarını valideyinlər alqışlarla qarşıladı. Nağıl saatında uşaqlara həmçinin, meyvələrin əhəmiyyətindən danışıldı, qeyd olundu ki, meyvə insanlar üçün dadlı qidadan əlavə, orqanizmin sağlamlığını təmin edən əhəmiyyətli vasitələrdəndir. Onlardan bir çoxu A,B,C vitaminlərinin mənbəyi , bəziləri də xəstəliklər əleyhinə təsiredici funksiyalara malikdir. Həkimlərin məsləhətinə görə, hər bir insan gündə ən az bir alma yeməlidir. Çünki meyvə insan orqanizminin dostu sayılır.
Tədbirin sonunda iştirak edən bir neçə valideynə də çıxış üçün söz verildi. Onlar öz çıxışlarında bildirdilər ki, nağılın kiçik yaşlı oxucular üçün əhəmiyyəti çox böyükdür. Kitab oxuyan, nağılların təsiri ilə böyüyən uşağın söz ehtiyatı zəngin, nitqi isə rəngarəng olur. Nağıllar balaca oxucuların zövqünü oxşayır, qəhrəmanları onlara sevdirir, yaxşı ilə pisi, xeyir ilə şəri başa salır. Nağılı oxuduqdan sonra uşaqlar buradakı hadisələr və qəhrəmanlarla bağlı müzakirələrdə iştirak etməklə, hadisələrin ardıcıllığını düzgün müəyyən edir, ilk dəfə rastlaşdıqları sözlərin mənasını öyrənirlər.
Qeyd etmək lazımdır ki, hər həftənin bazar günləri kitabxananın Nağıl otağında Nağıl saatının keçirilməsində başlıca məqsəd həm də kiçikyaşlı oxuculara tərbiyəvi təsir göstərməkdən ibarətdir. Belə ki, bədii əsərlərdəki obrazlar, psixoloji hallar, hadisələrin inkişafı uşaqların dünyagörüşünü genişləndirir, uşaqlarda yüksək insani hisslərin, əxlaqi keyfiyyətlərin tərbiyə olunmasını təmin edir.

Tədbirin səkilləri
Bütün xəbərlər