13 mart 2026-cı il tarixində F.Köçərli adına Respublika Uşaq Kitabxanasında Bakı Dövlət Universitetinin Şərqşünaslıq fakültəsinin Regionşünaslıq (ərəb ölkələri üzrə) ixtisası üzrə IV kurs tələbələrinə dosent Səbinə Mirzəyeva və kitabxananın avtomatlaşdırma şöbəsi  tərəfindən təlim keçirilib. 

Təlim çərçivəsində tələbələrə “Tərcümə və mətnlə iş”, “Mədəniyyət və regionşünaslıq istiqaməti” və “Kitabxana yönümlü yaradıcı iş” bölmələri üzrə təcrübə fəaliyyətinə dair tapşırıqlar verilib.  Proqramda Azərbaycan xalq nağıllarının ərəb dilinə tərcüməsi, terminoloji uyğunluğun araşdırılması, Azərbaycan və ərəb folklor motivlərinin müqayisəsi, nağıllarda mədəni kodların təhlili kimi elmi-praktik tapşırıqlar yer alıb. Bununla yanaşı, tələbələr seçilmiş ərəb ölkələrinin folkloru haqqında məlumatların hazırlanması, nağıl qəhrəmanlarının müqayisəli təhlili, Şərq nağıllarında “Ana və uşaq” obrazının araşdırılması kimi mövzular üzərində də işləyəcəklər.

Təcrübənin kitabxana yönümlü hissəsində isə “Azərbaycan nağılları ərəb dilində” adlı biblioqrafik siyahının hazırlanması, nağıllar üzrə kitab sərgisinin təşkili, elektron təqdimatların hazırlanması, sosial şəbəkələr üçün maarifləndirici materialların yaradılması və nağıl oxu gününün keçirilməsi planlaşdırılır.

Təlimin sonunda tələbələr təcrübə üzrə yekun hesabat təqdim edəcəklər. Bu təcrübə onların həm elmi biliklərini möhkəmləndirməyə, həm də kitabxana mühitində praktiki bacarıqlar qazanmasına mühüm töhfə verəcək.