12–16 aprel 2026-cı il tarixlərində Firidun bəy Köçərli adına Respublika Uşaq Kitabxanasında 257 nömrəli tam orta məktəbin ibtidai sinif şagirdləri, 135 nömrəli uşaq bağçasının tərbiyəçiləri və 1 nömrəli uşaq evi sosial xidmətlər şöbəsinin 1 nömrəli uşaq evi sosial xidmətlər şöbəsinin üçün maarifləndirici ekskursiya təşkil edilib.

Ekskursiya çərçivəsində uşaqlara kitabxanadan istifadə qaydaları, elektron kataloq sistemindən yararlanma imkanları və kitabların qorunması ilə bağlı vacib tövsiyələr təqdim olunub. Şagirdlər kitabxananın fəaliyyəti ilə yaxından tanış olaraq zəngin kitab fondu, uşaq ədəbiyyatı nümunələri və oxu zalları haqqında ətraflı məlumat əldə ediblər.

Tədbir zamanı kitabxana əməkdaşları tərəfindən uşaqlarla kitabın əhəmiyyəti və mütaliənin insan həyatındakı rolu barədə maarifləndirici söhbətlər aparılıb. Daha sonra təşkil olunan “Nağıl saatı” proqramı çərçivəsində Azərbaycan və dünya xalqlarının nağıllarından nümunələr səsləndirilib. Uşaqlar nağıl qəhrəmanlarının macəralarını maraqla dinləyib, eyni zamanda sevdikləri nağılları təqdim etmək imkanı qazanıblar.

Ekskursiyanın əsas məqsədi şagirdləri kitabxana mühiti ilə tanış etmək, onların kitaba və mütaliəyə marağını artırmaq olub. Bu cür tədbirlər uşaqların dünyagörüşünün genişlənməsinə, milli-mənəvi dəyərlər əsasında formalaşmasına və asudə vaxtlarının səmərəli təşkilinə mühüm töhfə verir.