13 fevral 2026-cı il tarixində F.Köçərli adına Respublika Uşaq Kitabxanasınin 2 saylı filialında “14 Fevral – Beynəlxalq Kitab Bağışlama Günü” münasibətilə tədbir təşkil olunub. Tədbirdə kitabxananın daimi oxucuları iştirak ediblər. 

Tədbir çərçivəsində uşaq ədəbiyyatı nümunələrindən və mütaliəni təbliğ edən vəsaitlərdən ibarət “Kitab bağışlayaq, dost qazanaq” adlı sərgi təşkil olunub. Sərgidə uşaqlar üçün maraqlı və maarifləndirici kitablar nümayiş olunub, kitab bağışlama ənənəsinin əhəmiyyəti xüsusi vurğulanıb. 

Kitabxana əməkdaşları çıxış edərək Beynəlxalq Kitab Bağışlama Gününün tarixi və məqsədi haqqında ətraflı məlumat veriblər. Bildirilib ki, bu əlamətdar gün 14 fevral 2012-ci ildən etibarən dünya miqyasında qeyd olunur. Günün əsas məqsədi uşaqlarda mütaliəyə marağı artırmaq, onlarda oxu vərdişi formalaşdırmaq və kitaba çıxış imkanı məhdud olan uşaqları kitablarla təmin etməkdir. Bu təşəbbüs dünyanın müxtəlif ölkələrində müəlliflər, bloqqerlər və uşaq yazıçıları tərəfindən dəstəklənir. 

Tədbirin davamında uşaqlar arasında mövzu ilə bağlı əyləncəli və maarifləndirici viktorina keçirilib. İştirak edən  uşaqlara kitablar hədiyyə olunub. 

Keçirilən tədbir uşaqlarda kitaba sevgi və mütaliəyə marağın artırılması baxımından xüsusi əhəmiyyət kəsb edib.