9 oktyabr 2025-ci il tarixində Dövlət Tibbi-Sosial Ekspertiza və Reabilitasiya Agentliyinin 2 nömrəli Uşaq Reabilitasiya Mərkəzində F.Köçərli adına Respublika Uşaq Kitabxanasının 2 saylı filialının təşkilatçılığı ilə “Ümumdünya Heyvanları Müdafiə Günü”nə həsr olunmuş tədbir təşkil edilib. Tədbir çərçivəsində uşaqlar üçün cizgi filmləri nümayiş etdirilib və mövzuya uyğun kitab sərgisi təqdim olunub.

Kitabxana əməkdaşları əvvəlcə əlamətdar günün yaranma tarixi haqqında məlumat veriblər. Qeyd olunub ki, “Ümumdünya Heyvanları Müdafiə Günü” ilk dəfə 1931-ci ildə nəsli kəsilməkdə olan heyvan növlərinə diqqət çəkmək məqsədilə qeyd edilməyə başlanıb. O vaxtdan etibarən milli, dini və dil fərqlərindən asılı olmayaraq hər kəs tərəfindən 4 oktyabr tarixi dünyada yaşayan bütün heyvanların müdafiəsinə həsr olunan gün kimi qeyd olunur.

Uşaqlar sərgidə təqdim olunan kitablarla tanış olub, onlara heyvanlar mövzusunda müxtəlif nağıllar oxunub. Daha sonra uşaqlar “İki ayı balası”, “Siçan və pişik” və digər maarifləndirici cizgi filmlərini izləyiblər.

Tədbirin əsas məqsədi fiziki məhdudiyyətli uşaqların sosiallaşmasına dəstək olmaq, heyvanların qorunmasının əhəmiyyəti barədə məlumatlandırmaq, həmçinin nümayiş olunan cizgi filmləri vasitəsilə onların dinləmə və anlama bacarıqlarını inkişaf etdirmək olub.