4-7 noyabr 2025-ci il tarixlərində Respublika Uşaq Kitabxanasında maraqlı və tədrisə yönəlmiş silsilə master-klasslar təşkil edilib. Tədbirə 1 nömrəli Uşaq-Gənclər İnkişaf Mərkəzinin (UGİM) müxtəlif dərnək üzvləri və Rüstəm Əliyev adına 3 nömrəli məktəbin ibtidai siniflərinin şagirdləri qatılıb.
Master-klasslar çərçivəsində şagirdlər müxtəlif yaradıcı fəaliyyətlərə qoşulub, yeni biliklər əldə edib və kitabxana ilə daha yaxından tanış olublar. Tədbir zamanı uşaqların təxəyyüllərini inkişaf etdirən oyunlar və interaktiv məşğələlər keçirilib, eyni zamanda, onlara kitab oxumağın və bilik əldə etməyin əhəmiyyəti barədə məlumatlar verilib.
Onlar rəngli kağızlardan və gildən müxtəlif fiqurlar hazırlayıb, öz bacarıqlarını sərbəst şəkildə ifadə etməyə imkan tapıblar.Həmçinin, şəkilləri rəngləyərək, kompozisiyalar yaradıblar və müxtəlif naxışları tətbiq ediblər.
Kitabxanada təşkil olunan bu cür tədbirlərin əsas məqsədi şagirdlərin mədəniyyətə, incəsənətə və kitab dünyasına olan marağını artırmaqdır.
Respublika Uşaq Kitabxanası şagirdlərin yaradıcılığını dəstəkləmək və onlara yeni biliklər aşılamaq istiqamətindəki fəaliyyətini davam etdirəcək.
