25 dekabr 2024-cü il tarixində F.Köçərli adına Respublika Uşaq Kitabxanasında 88 nömrəli tam orta məktəbin şagird və müəllim kollektivinin iştirakı ilə Süleyman Sani Axundovun “Qaraca qız” əsərinin müzakirəsi təşkil olunub. Müzakirə zamanı öncə kitabxananın əməkdaşı tərəfindən Azərbaycan ədəbiyyatının çoxəsrlik tarixi haqqında ətraflı məlumat verilib, uşaqlara “Qaraca qız” əsəri əsasında çəkilən eyniadlı film təqdim edilib. Uşaqlar isə əsəri oxuduqlarını, çox maraqla qarşıladıqlarını söyləyib, “Qaraca qız” əsərini səhnəcik şəklində təqdim ediblər.

Maarifpərvər ədib Süleyman Sani Axundovun məktəbə, elmə və təhsilə çağıran əsərlərinin əsas, nümunəvi qəhrəmanları xeyirxah ziyalılarla nəcib tələbələr, məsum uşaqlarla müdrik qocalar olmuşdur. Süleyman Sani Axundov şagirdlərin qəlbinə yol tapa bilən ustad müəllim idi. “Qaraca qız” kitabında özünün yüksək mənəvi keyfiyyətləri, qabaqcıl fikri, ensiklopedik biliyi, səmimiliyi, tələbkarlığı ilə ictimaiyyətin dərin hörmətini qazanmış, geniş psixoloji, pedaqoji biliyə malik ədibin “Qorxulu nağıllar”ı və “Uşaqlıq həyatımdan xatirələr”i toplanıb.