27 may 2024-cü il tarixində F.Köçərli adına Respublika Uşaq Kitabxanasında Hüseynqulu Sarabski adına 7 saylı musiqi məktəbinin birinci sinif şagirdlərinin iştirakı ilə bayram tədbiri baş tutub. “28 May – Müstəqillik Günü” münasibətilə təşkil edilmiş tədbirdə 8 №-li tam orta məktəbin şagirdləri qonaq qismində iştirak edib.

Əvvəlcə Azərbaycan Respublikasının Dövlət himni səsləndirilib, ardınca isə Vətən uğrunda şəhid olmuş qəhrəman oğullarımızın ruhları 1 dəqiqəlik sükutla yad edilib. Elmi işlər üzrə direktor müavini Zahirə Dadaşova tədbiri açıq elan edib və çıxışında müstəqilliyimiz bərpa edildikdən sonra hər il bu bayramın ölkəmizdə böyük təntənə ilə qeyd olunduğunu, bu mühüm tarixi və ictimai-siyasi hadisənin milli yaddaşda mühüm yer tutduğunu bildirib.

Məktəbin müəllimələrinin müşayiəti ilə şagirdlər müxtəlif musiqi alətlərində  Ü.Hacıbəyovun "Çırpınırdı qara dəniz",  F.Əmirovun "Çeşmə başında", Motsartın "Rondo", M.Nəsirbəyovun "Mahnı", A.Rzayevanın "Dəcəl Buzovum", R.Hacıyevin "Azərbaycanım" və s. musiqi əsərlərini ifa ediblər. 

Respublika Günü tariximizin ən şanlı və parlaq səhifələrindəndir. 1918-ci il mayın 28-də Azərbaycan Xalq Cümhuriyyətinin yaradılması ölkəmizin həyatına böyük tarixi hadisə kimi daxil oldu. Müstəqil, azad, demokratik respublika qurmaq məqsədini qarşıya qoyan Azərbaycan Xalq Cümhuriyyəti cəmi 23 aylıq fəaliyyəti dövründə xalqın milli mənlik şüurunu özünə qaytardı, onun öz müqəddəratını təyin etməyə qadir olduğunu nümayiş etdirdi. 1918-ci il mayın 28-də qəbul edilən İstiqlal Bəyannaməsindən də göründüyü kimi, bu möhtəşəm tarix xalqımızın müstəqillik hisslərini daha da gücləndirdi.