13-26 dekabr tarixlərində  Mədəniyyət Nazirliyinin dəstəyi və  Regional Mədəniyyət İdarələrinin tərəfdaşlığı ilə bölgələrdə Əməkdar Mədəniyyət işçisi Zahirə Cabirin “Böyük Azərbaycanlı” kitabının təqdimatı baş tutdu. Ulu öndər Heydər Əliyevin 100 illiyinə həsr olunmuş kitab təqdimatı  regionların Qusar, Xaçmaz, Gəncə, Şəmkir, Qazax, Sabirabad bölgələrinin  oxucuları üçün təqdim edildi. Keçirilən təqdimatlarda Azərbaycan Respublikasının Dövlət Himni səsləndirilib, Ulu Öndər Heydər Əliyevin və torpaqlarımızın azadlığı uğrunda canlarını qurban verən şəhidlərin əziz xatirəsi bir dəqiqəlik sükutla yad edilib. Kitabın müəllifi çıxışlarında qeyd edib ki, bütün həyatını xalqının xoşbəxt gələcəyinə, qüdrətli Azərbaycan dövlətinin yaradılmasına və inkişafına həsr etmiş ulu öndər Heydər Əliyevin Vətən və xalq qarşısındakı xidmətləri misilsizdir. Həmçinin müəllif qeyd edib ki, kitabdakı hekayələr real tarixi hadisələr əsasında işıqlandırılmaqla ömrünü  sevdiyi xalqına, onun müstəqilliyinə, dövlətçiliyinə həsr edən , xalqın sevgisi və məhəbbəti ilə ucalan şəxsiyyət –Heydər Əliyevə həsr olunub. “Böyük Azərbaycanlı” adlı kitabdakı hekayələrin əsas məqsədi Ulu öndərin keçdiyi həyat yolunu, milli dəyərlərimizin qoruyucusu kimi  onun yüksək mənəvi keyfiyyətlərini boyüməkdə olan gənc nəslə təqdim etməkdir. Sinifdənxaric oxu üçün nəzərdə tutulan  kitabda Ümumilli lider Heydər  Əliyevin  fəaliyyəti və irsi təqdim olunmuşdur. Bu  uşaqların ölkənin  layiqli vətəndaşları kimi yetişməsinə zəmin yaradacaqdır.   

Ümummilli lider Heydər Əlyevin  şəxsiyyəti, ideyaları, ömür yolu və irsi əsasında şagirdlərin dünyagörüşü zənginləşir, vətənpərvərlik, insansevərlik  hissləri artır. Onlar yaxşı nümunələrin, nəcib ideyaların əbədiyaşarlığı uğrunda  mübarizəyə ruhlanırlar.