Respublika Uşaq Kitabxanasının təşkilatçılığı ilə 8-ci Beynəlxalq Kitab Sərgisində “Şuşa ili”-nə həsr olunmuş Zahirə Cabirin “Əvvəl Zaman İçində” adlı kitabının təqdimatı baş tutdu.

Oktyabrın 9-da  Bülbül təqdimat zonasında “Təhsil” Nəşriyyat Poliqrafiya Müəssisəsinin, F. Köçərli adına Respublika Uşaq Kitabxanasının tərəfdaşlığı ilə Zahirə Cabirin Qarabağ haqqında nağıl və əfsanələri özündə ehtiva edən “Əvvəl Zaman İçində” adlı kitab oxuculara təqdim edildi. 

Kitabda “Özümdən özümə məktub” adlı esse, Qarabağın qədim tarixi mədəni abidələri haqqında 7 nağıl və 7 əfsanə yer almışdı. Nəşr olunan nağıl və əfsanələr müəllifin zəngin təxəyyülünün məhsuludur. Həmçinin müəllifin fikrincə, Qarabağ haqqında nağıl və əfsanələri yazmaqda əsas məqsədi  bu gözəl diyarın  qədimliyini oxucuya çatdırmaqdır. Nağıl və əfsanələr uşaq və yeniyetmələrin bir vətəndaş kimi formalaşmasında ədalət və xeyirxahlıq aşılayır, çevik düşüncə və cəsarətli fikir yürütmək bacarığı tərbiyə edir.

Kitabın redaktoru uşaq yazarı Sevinc Nuruqızı, rəssamı Nərmin Abdullayevadır.  “Əvvəl Zaman İçində” kitabı orta yaş qrup oxucular  üçün nəzərdə tutulmuşdur.