12 dekabrda Respublika Uşaq Kitabxanasında Ümummilli Lider Heydər Əliyevin Anım Günü münasibəti ilə tədbir keçirildi. Tədbir Ulu Öndər Heydər Əliyevin əziz xatirəsini bir dəqiqəlik sükutla yad edilməsi ilə başladı.Tədbiri giriş sözü ilə F. Köçərli adına Respublika Uşaq Kitabxanasının direktoru Şəhla Qəmbərova açaraq, dahi şəxsiyyət Heydər Əliyevin həyat və siyasi fəaliyyəti haqqında geniş məlumat verdi. Direktor çıxışında bildirdi ki, Heydər Əliyevin Azərbaycan rəhbərliyinə qayıdışının başlıca qayəsini müstəqillik, azərbaycançılıq, dövlətçilik, demokratiya, milli tərəqqi, dünyəvilik kimi ümumbəşəri dəyərlər təşkil etmişdir. Hər bir xalqın milli azadlıq və istiqlaliyyət tarixində xilaskar rolunu oynayan dahi insanlar var. Həmin dahilər öz qətiyyətləri ilə mənsub olduqları xalqı arxasınca aparıb, ən taleyüklü məqamlarda qalib rolu oynamışlar. Azərbaycan xalqının ümummilli lideri Heydər Əliyev müasir dünya tarixinə parlaq və silinməz iz qoymuş böyük şəxsiyyət, qeyri-adi zəka, fitri istedad sahibi, müdrik dövlət xadimi kimi düşmüşdür.

Bu gün ölkəmiz bu siyasətin uğurlarını hiss edir, onunla yaşayır və faydalanır. Bu siyasətin icraçısı Ulu Öndərimizin layiqli siyasi varisi cənab İlham Əliyevdir. Heydər Əliyev siyasəti Azərbaycanın uğurlarının əsasıdır və gələcəyə istiqamətlənmişdir. Tədbirin davamında çıxış edən kitabxananın əməkdaşı Cavidan Səfərli qeyd etdi ki,  Azərbaycan Respublikasının Prezidenti İlham Əliyev Sentyabrın 29-da  2023-cü ilin ölkəmizdə “Heydər Əliyev İli “ elan edilməsi haqqında Sərəncam imzalanmışdır. Daha sonra, Ulu Öndərin rolundan söz açaraq həm mədəniyyətdə, həm də kitabxanaçılığın inkişafı kimi bir sahədə  əvəzedilməz xidmətlərindən bəhs etdi. Qeyd etdi ki, mədəniyyətimizdə elə bir sahə yoxdur ki, Heydər Əliyev qayğısından bəhrələnməsin. 

Çıxışdan sonra, Ümummilli Lider Heydər Əliyevə həsr olunmuş  videoçarx nümayiş olundu. Tədbirin sonunda Ulu Öndər Heydər Əliyevin həyat və fəaliyyətinin müxtəlif mərhələlərini əks etdirən kitab sərgisinə baxış keçirildi.