07 aprel tarixində Firidun bəy Köçərli adına Respublika Uşaq Kitabxanasında TEAS Press Nəşriyyat evinin “Üç alma” uşaq ədəbiyyatı bölməsində nəşr olunan bir sıra kitabların müzakirəsi keçirildi. Tədbirdə Nərimanov r-nu 47 saylı məktəbin 3-cü sinif şagirdləri iştirak etdilər. Kitab müzakirəsini giriş sözü ilə açan kitabxana əməkdaşı İ.Abdullayeva qeyd etdi ki, TEAS Press Nəşriyyat Evinin "3 alma" uşaq ədəbiyyatı bölməsi 2014-cü ildə yaradılıb. Bölmənin məqsədi Azərbaycan dilində uşaqları əyləndirmək, maarifləndirmək və onları mütaliəyə həvəsləndirməyə istiqamətlənmiş keyfiyyətli kitablar nəşr etməkdir. Məktəblilər ingilis uşaq yazarları Kris Oksleydin relyef formalarından bəhs edən “Dağlar”, “Dərələr”, “Vulkanlar”, E.Labrekin “Mağaralar”, “Adalar” və eləcə də Ancela Roystonun “Dağlarda qida zənciri”, “Səhralarda qida zənciri”, “Çöllərdə qida zənciri” kitablarını müzakirə etdilər. Kitabxana əməkdaşı uşaqlara kitablardan slayd formatında maraqlı məlumatlar verdi, mövzu üzrə viktorina keçirdi. Məktəblilər sualları fəal şəkildə cavablandırdılar. 

Tədbirin keçirilməsində məqsəd uşaqların təbiət haqqında biliklərini zənginləşdirmək, relyef formaları, onların quruluşu, heyvanlar aləmi və onların xüsusiyyətləri, qidalanmaları, qorunmaları haqqında olan məlumatlarla tanış etməkdir.