22 fevral 2022-ci il tarixində F.Köçərli adına Respublika Uşaq Kitabxanasında İrəvan Müəllimlər Seminariyasının yaranmasının 140 illiyinə həsr olunmuş tədbir keçirildi. Azərbaycan Respublikası Prezidentinin 29 dekabr 2021-ci il tarixində imzaladığı sərəncamına əsasən 46, 4, Şuşa şəhər 2 nömrəli məktəblərin və Gənclər Respublika Bədii Yaradıcılıq evinin şagirdləri 1885-1895-ci illərdə seminariyada müəllimlik etmiş maarifçi, pedaqoq, uşaq folklor antalogiyasının banisi F.Köçərlinin adını daşıyan Respublika Uşaq kitabxanasını ziyarət edirlər.

Kitabxananın əməkdaşı Azərbaycanın görkəmli ədəbiyyatşünas alimi, tanınmış maarifpərvər, ictimai xadim, publisist-yazıçı, tənqidçi və tərcüməçi Firidun bəy Köçərlinin həyat və yaradıcılığı haqqında geniş məlumat verdi və bildirdi ki, F.Köçərli seminariyanın ilk müəllimlərindən olmuş, geniş mədəni-maarif işləri aparmışdır. Seminariyanın bir çox tanınmış şəxsiyyətlərinin yetişməsində F.Köçərlinin xüsusi xidmətləri olmuşdur.

Tədbir zamanı iştirakçılar F.Köçərliyə həsr olunmuş sənədli filmi izlədilər.   

Tədbirdən sonra məktəblilər kitabxananın fəaliyyəti və istifadə qaydaları, kitab sərgiləri, elektron kitabxana və elektron məlumat bazası  haqqında ətraflı məlumat aldılar.