27 dekabr tarixində F.Köçərli adına Respublika Uşaq Kitabxanasının təşkilatçılığı ilə Azərbaycan uşaq ədəbiyyatı xəzinəsinə dəyərli töhfələr verən yazıçı, şair Qəşəm İsabəyliyə Beynəlxalq Uşaq Kitabı Şurasının Andersen adına fəxri diplomlun təltif edilməşi ilə bağlı tədbir keçirildi.
Qeyd edək ki, diplom yazıçı Qəşəm İsabəylinin “Keçinin Azadlıq nağılı” elektron kitabına təqdim edilib.
Tədbirin keçirilməsində məqsəd Azərbaycan uşaq yazarlarıını (İBBY )vasitəsilə tanıtmaq və uşaq ədəbiyyatını təbliğ etməkdir.
Yazıçı, şair Qəşəm İsabəyli yaradıcılığının əsas qayəsi uşaqların zehni inkişafına təsir və nitqin təkmilləşməsinə xidmət edən bir-birindən maraqlı ədəbi nümunələrdir. Bədii forma və məzmun axtarışları, orijinal üslubu ilə seçilən, Azərbaycan uşaq ədəbiyyatına yeni nəfəs gətirən Qəşəm İsabəylinin rəngarəng yaradıcılığı məhz dünya uşaq ədəbiyyatının münsifi sayılan Beynəlxalq Uşaq Kitabı Şurasının Fəxri Andersen Diplomuna layiq görülməsinə səbəbdir.
Tədbir zamanı Qəşəm İsabəyli haqqında video slayd iştirakçılara təqdim edildi.
Təqdimata görə Respublika Uşaq Kitabxanasına minnətdarlığını bildirən yazıçı Azərbaycan uşaq ədəbiyyatı ilə bağlı fikirləri bölüşdü və tədbirin iştirakçılarına yeni şeirlərini təqdim etdi.
Tədbirdə iştirak edən uşaq yazarları Zahid Xəlil və Eyvaz Zeynalov çıxışlarında qeyd etdilər ki, uşaq əsəri yaratmaq üçün yazıçıdan böyük məharət tələb olunur. Uşaq ədəbiyyatı nümunələri özünün forma yığcamlığı, məzmun aydınlığı, dil sadəliyi, axıcılıq, oynaqlıq və ahəngdarlığı baxımından böyüklər üçün yazılan ədəbiyyatdan fərqlənir. Şairin şeirlərində gözəgörünməz bir sehr, uşaqları özünə cəlb edən bir mərhəmət, doğmalıq hissi hökm sürür, bu da uşaqların qəlbini rövnəqləndirir, onları ədalətli, ləyaqətli bir insan kimi yetişdirmək üçün tərbiyələndirir.
Tədbir xatirə şəkillərinin çəkilişi ilə başa çatdı.
Qeyd edək ki, F.Köçərli adına Respublika Uşaq Kitabxanası 2012-ci ildən Beynəlxalq Uşaq Kitabı Şurasının (İBBY) üzvüdür. Bu günə qədər F.Köçərli adına Respublika Uşaq Kitabxanasının İBBY-Milli Bölməsi tərəfindən Beynəlxalq Uşaq Kitabı Şurasının Andersen Fəxri mükafatına uşaq yazarlarından Sevinc Nuruqızı, Solmaz Amanova və Xalq Rəssamı Arif Hüseynovun əsərləri təqdim edilmişdir.
