16 noyabr 2018-ci ildə F.Köçərli adına Respublika Uşaq kitabxanasının 1 saylı filialının əməkdaşları Binəqədi rayonunda yerləşən 283 saylı tam orta məktəblə birgə millət vəkili Qənirə Paşayeva ilə görüş və onun yaradıcılığına həsr olunmuş tədbir keçirdi. Tədbir Azərbaycan Dövlət Himninin səslənməsi ilə başladı. Tədbirdə millət vəkili Q.Paşayeva, türkmən şairi Adil Şan və türk tədqiqatçı yazar Sara Pourda, Təhsil Nazirliyinin məsul əməkdaşları iştirak edirdi. Məktəbin direktoru Tünzalə Zeynalova tədbiri açaraq Q.Paşayevanın yaradıcılığı ilə bağlı ətraflı məlumat verdi və keçirilən belə tədbirlərin məktəblilər üçün nə qədər dəyərli olduğunu vurğuladı. Sonra türkmən şairi Adil Şan “Türkmən dağı” şeirini söylədi, türkmən dili ilə bağlı çıxış etdi, öz ifasında musiqi səsləndirdi. Türk tədqiqatçı yazar Sara Pourda çıxışında kitab, mütaliə ilə bağlı qiymətli fikirlərini bölüşdü. Q.Paşayeva öz çıxışında maraqlı çıxışlara görə təşəkkür etdi və  məktəblərdə belə bir maraqlı görüşdən məmnunluğunu ifadə edərək, bunu təkcə onun yaradıcılığına müraciət edilməsi ilə deyil, ümumiyyətlə şagirdlərin öz istedad və bacarıqlarını ifa edə bilmələri, yeni kitabları mütaliə edərək ona fikir bildirmələri, və s. ilə əlaqələndirdi. O, bir ziyalı, yazar və millət vəkili olaraq, həmişə yeniyetmələri oxumağa, öyrənməyə, savadlı olmağa, tariximizi, ədəbiyyatımızı dərindən bilməyə, vətənpərvərliyə, habelə zərərli vərdişlərdən uzaq olmağa çağırdı, onlara dəyərli məsləhətlər verdi. Tədbirin qonaqları olan əcnəbi yazarlar məktəbə öz kitablarını hədiyyə etdilər. Tədbirə gələn qonaqlar məktəbin foyesində kitabxana əməkdaşları tərəfindən tərtib olunmuş milli sərgi ilə tanış oldular. Tədbirin sonunda qonaqlara milli musiqimizi əks etdirən suvenirlər hədiyyə edildi, millət vəkili Q.Paşayeva tədbirin təşkilatçıları ilə  fikir mübadiləsi aparıb, maraqlı və yaddaqalan görüş təşkil etdikləri üçün məktəb rəhbərliyinə və kitabxana əməkdaşlarına öz təşəkkürünü bildirdi. Görüş xatirə şəkillərinin çəkilişi ilə başa çatdı.