Fevralın 26-da F.Köçərli adına Respublika Uşaq Kitabxanası Binəqədi rayonundakı 144 saylı orta məktəblə birgə Xocalı faciəsinin 26-cı ildönümünə həsr edilmiş tədbir keçirdi. Anım tədbiri dövlət himninin səslənməsi və soyqırım qurbanlarının xatirəsinin bir dəqiqəlik sükutla yad edilməsi ilə başladı. Şagirdlər Xocalı faciəsinin ağrılarını, düşmənə qarşı nifrət hislərini vətənpərvərlik ruhunda səsləndirdikləri şeirlər, ədəbi-bədii kompozisiyalar vasitəsilə ifadə etdilər. Daha sonra Qarabağ döyüşlərinin iştirakçıları, Xocalı sakini Azərbaycan xalqının soyqırımı siyasətinə məruz qalmasından, öz tarixi torpaqlarından qovularaq qaçqın və məcburi köçkünə çevrilməsindən danışaraq Xocalı soyqırımının heç zaman unudulmayacağını vurğuladılar. Bildirildi ki, Xocalı soyqırımı tarixə qanla yazılan faciədir. Bu faciə illər, əsrlər ötsə də xalqımızın yaddaşından silinməyəcək və soyqırımı qurbanlarının xatirəsi daim yaddaşlarda yaşayaraq, ruhları əziz tutulacaq. Bu gün bizim güclü ordumuz var. O güclü ordunun rəşadətli oğulları soqırım qurbanlarının erməni daşnaklarından qisasını alacaq , ata-baba torpağını düşmən torpaqlarından azad edəcək , üçrəngli bayrağımızı Qarabağ torpaqlarında dalğalandıracaq. Tədbirin sonunda kitabxananın direktoru müavini Zahirə Dadaşova məktəbin kollektivinə   və tədbirin təşkilatçılarına gənc nəslin hərbi vətənpərvərlik ruhunda tərbiyəsində göstərdikləri təşəbbüsə görə təşəkkür etdi və bildirdi ki, məktəblilərlə belə tədbirlərin keçirilməsi ölkəmizin müstəqilliyi uğrunda mübarizədə canlarını qurban vermiş vətən övladlarını yad etmək, böyüməkdə olan nəslə doğma Vətənə sevgi, məhəbbət hissləri aşılamaq, məktəblilər arasında milli vətənpərvərlik ruhunu yüksəltmək və Xocalı soyqırımı haqqında həqiqətləri çatdırmaq məqsədinə xidmət edir. Qeyd edək ki, “Xocalı fəryadı” kitab sərgisini məktəbin müəllim və şagird kollektivi böyük maraq və həyəcanla izlədilər.