20 fevral 2026-cı il  tarixində Beynəlxalq Ana Dili Günü münasibətilə Respublika Uşaq Kitabxanasında 161 və 193 nömrəli tam orta məktəbin şagirdlərinin iştirakı ilə uşaq yazarı Gülzar İbrahimova ilə görüş təşkil olunub.

Tədbirin əvvəlində yazıçı şagirdlər qarşısında çıxış edərək qeyd edib ki, hər bir vətəndaşın vəzifəsi bu dili qorumaq, zənginləşdirmək və gələcək nəsillərə saf, işlək və nüfuzlu şəkildə ötürməkdir. 

Daha sonra müəllif öz şeirlərini səsləndirib, ədəbiyyatın uşaqların dünyagörüşünün formalaşmasında və estetik zövqünün inkişafında mühüm rol oynadığını qeyd edib. Şagirdlər də öz növbəsində şeirlər söyləyib, bədii dilin gözəllikləri barədə fikirlərini bölüşüblər.

Görüş interaktiv formatda davam edib. Şagirdlər yazıçıya onun yaradıcılığı, şeir və nağıl mövzularına yanaşması ilə bağlı müxtəlif suallar ünvanlayıblar. Gülzar İbrahimova sualları ətraflı cavablandıraraq uşaqlara mütaliənin, yaradıcılığın və ədəbiyyata marağın vacibliyini izah edib, onları mütəmadi oxumağa və öz yaradıcılıq qabiliyyətlərini inkişaf etdirməyə təşviq edib.

Tədbirin əsas məqsədi şagirdlərə ana dilimizin dəyəri, ədəbiyyatın cəmiyyət həyatındakı rolu və uşaqlar üçün yazılmış bədii əsərlərin əhəmiyyəti barədə məlumat vermək olub. Belə görüşlər şagirdlərin mütaliəyə marağının artırılmasına, onların mədəni-estetik inkişafına və ədəbi mühitlə daha sıx əlaqələrinin formalaşmasına mühüm töhfə verir.