1-2 oktyabr 2025-ci il tarixlərində Bakı Ekspo Mərkəzində keçirilən XI Bakı Beynəlxalq Kitab Sərgisi çərçivəsində F.Köçərli adına Respublika Uşaq Kitabxanası uşaqlar üçün  faydalı tədbirlər təşkil edib.

Sərginin ilk günündə müxtəlif qonaqlar kitabxananın stendini ziyarət ediblər. Süni intellekt texnologiyası əsasında hazırlanan kitabların video icmalları ziyarətçilərə nümayiş etdirilib. Bununla yanaşı, uşaqlar üçün rəngləmə fəaliyyətləri və yaradıcı master-klasslar təşkil olunub. Kitabxana əməkdaşlarının dəstəyi ilə balaca oxucular rəngarəng külək gülü və zərflər hazırlamağı öyrəniblər. Onlar hazırladıqları zərflərdə müəllimlərinə ən xoş arzularını yazaraq hədiyyə ediblər. Bu cür yaradıcı fəaliyyətlərin əsas məqsədi uşaqlarda estetik zövqü formalaşdırmaq və onların əl bacarıqlarını inkişaf etdirməkdir.

Sərginin ikinci günündə yazıçı-publisist Sevinc Nuruqızı ilə ADA İbtidai Məktəbinin 1-ci sinif şagirdləri arasında görüş keçirilib. Tədbir “Oxu saatı” çərçivəsində təşkil olunub. Yazıçı öz əsərlərindən nümunələr oxuyaraq uşaqlarla maraqlı söhbətlər aparıb. Balaca oxucular böyük həvəslə sual-cavabda iştirak edib, öz fikirlərini bölüşüblər.

F.Köçərli adına Respublika Uşaq Kitabxanasının 11-ci Bakı Beynəlxalq Kitab Sərgisində iştirakı uşaqların kitaba marağını artırmaq və onların asudə vaxtını faydalı şəkildə təşkil etmək məqsədini daşıyır. Sərgi çərçivəsində kitabxananın maraqlı təqdimatları və müxtəlif yaş qruplarına uyğun tədbirləri növbəti günlərdə  davam edəcək.