29 may 2025-ci il tarixində F.Köçərli adına Respublika Uşaq Kitabxanasında Azərbaycan ədəbiyyatının görkəmli nümayəndəsi, Xalq şairi Bəxtiyar Vahabzadənin anadan olmasının 100 illiyi münasibətilə “Türk dünyasının Bəxtiyarı” adlı şeir müsabiqəsinin yekun mərhələsi keçirilib.

Müsabiqədə Bakı şəhərinin ümumi təhsil və məktəbdənkənar təhsil müəssisələrinin şagirdləri iştirak ediblər. 14 aprel tarixində start verilən müsabiqəyə ümumilikdə 60 şagird müraciət edib. Onlardan yalnız 24-ü seçim mərhələsini uğurla keçərək yekun mərhələdə iştirak hüququ qazanıb.

Respublika Uşaq Kitabxanasının direktoru çıxışında, finala çıxmış şagirdlərə təşəkkürünü bildirməklə, onların fəallığını, yaradıcılıq bacarıqlarını və poeziyaya olan maraqlarını yüksək qiymətləndirib. O, Bəxtiyar Vahabzadənin yaradıcılığının təkcə Azərbaycan ədəbiyyatı üçün deyil, ümumtürk ədəbi məkanı üçün də mühüm əhəmiyyət daşıdığını vurğulayıb. Daha sonra münsiflər heyyətindən Nizami Gəncəvi adına Ədəbiyyat İnstitutunun uşaq ədəbiyyatı şöbəsinin əməkdaşı, filologiya üzrə fəlsəfə doktoru İlhamə Ağazadə gənc iştirakçıları təbrik edib.

Müsabiqədə iştirak edən məktəblilər “Göy Qurşağı” uşaq jurnalı, kitablar, diplom və iştiraka görə təşəkkürnamələrlə təltif olunublar.

I, II və III yerin qaliblərinin adları isə “1 İyun - Beynəlxalq Uşaqların Müdafiəsi Günü” UİF-də açıqlanacaq və təltif olunacaqlar.

Tədbirin bədii hissəsində iştirakçılar şairin müxtəlif şeirlərini səsləndiriblər. Onların poetik ifaları tədbirə duyğusal və yüksək ədəbi ovqat bəxş edib.

Müsabiqənin keçirilməsində əsas məqsəd gənc nəslin ədəbi-bədii dünyagörüşünü formalaşdırmaq, poeziyaya marağını artırmaq və Bəxtiyar Vahabzadənin zəngin ədəbi irsinə sevgi və ehtiram hisslərini aşılamaq olub.