29 aprel – 2 may 2025-ci il tarixlərində Respublika Uşaq Kitabxanasında Abşeron rayon Məmmədli kənd məktəbi, 64 nömrəli tam orta məktəbin şagirdlərinə və 1 nömrəli UGİM-in dərnək üzvlərinə maarifləndirici və əyləncəli ekskursiyalar təşkil olunub. Kitabxana əməkdaşı tərəfindən şagirdlərə kitabxananın fəaliyyəti, şöbələri, oxu zalları və fondu haqqında ətraflı məlumat verilib. Sonra şagirdlərə F.Köçərlinin “Balalara hədiyyə” kitabı haqqında məlumat verilib, ədibin həyat və yaradıcılığını əks etdirən videoslayd təqdim edilib. Həmçinin ekskursiya iştirakçıları yeni kitablarla tanış olublar. Təqdim olunan nəşrlər arasında xüsusilə “Bədənim”, “Yerkürəsi”, “Döyüşçülər” və “Dinozavrlar” adlı maarifləndirici və maraqlı kitabların icmalı keçirilib. Eyni zamanda, məktəblilərə ucadan oxumaq üçün maraqlı nağıl kitabları təqdim olunub və sinifdən xaric oxu üçün müxtəlif məzmunlu yeni uşaq ədəbiyyatları haqqında ətraflı məlumat verilib. Kitabların məzmunu haqqında ətraflı məlumat verilib, uşaqların marağına səbəb olan faktlar və illüstrasiyalar nümayiş etdirilib. 

Ekskursiyanın davamında kitabxana əməkdaşları tərəfindən interaktiv sual-cavab sessiyası təşkil olunub. Həmçinin uşaqlar təqdim olunan kitabların məzmunundan istifadə edərək maraqlı oyunlarda iştirak ediblər. Keçirilən oyunlar uşaqların diqqətini cəlb edib, onların aktivliyini və biliklərini nümayiş etdirməyə şərait yaradıb.

Ekskursiyanın təşkil olunmasında məqsəd uşaqlarda kitab sevgisini artırmaq, onları kitabxana mühiti ilə tanış etmək və mütaliəyə maraq oyatmaqdır.