5 oktyabr 2024-cü il tarixində 10-cu Beynəlxalq Kitab Sərgisində F.Köçərli adına Respublika Uşaq Kitabxanası və “Nərmin Yayın Evi”nin birgə təşkilatçılığı ilə yazıçı Zahirə Cabirin “Təbiətin nağılı” adlı kitabının təqdimatı baş tutub.

Tədbir 189-190 nömrəli tam orta məktəbin 3-cü sinif şagirdlərinin təqdimatında nağıl qəhrəmanlarından Məlikməmməd, Göyçək Fatma, Tıq-tıq xanım, Xoruz, Cik-cik xanım, Siçanqulu bəy və Torpaq obrazlarının təbiətlə bağlı fikirlərini əks etdirən bədii kompozisiya ilə başlanıb. Daha sonra məktəblilər təbiətlə bağlı qısa annotasiyalı məlumatlar səsləndiriblər. Çıxış edənlər xalqın sərvəti olan Vətənimizin zəngin təbiətindən, onun qorunması və mühafizə edilməsindən danışıblar.

Yazıçı Zahirə Cabir çıxışına tədbirə gələn qonaqları salamlamaqla başlayıb və qeyd edib ki, hazırda ekoloji tarazlığın qorunması, ətraf mühitin mühafizəsi, iqlim dəyişiklikləri ən aktual mövzulardandır. Kitabda təbiət haqqında 10 hekayə yer alıb.

Təbiət öz nağılları ilə bizə nə demək istəyir? Təbiəti qorumaq üçün nə etməliyik? Əgər təbiətin nizamı pozularsa, nələr baş verər? Sizcə, bu nizamın pozulmasının qarşısını almaq olarmı? Bu suallara cavabı “Təbiətin nağılı” kitabını oxumaqla biləcəksiniz. 

Tədbir məktəblilərin rəqsi ilə başa çatıb.