2022-ci il martın 31-də Türkiyə Respublikasının Bursa şəhərində Beynəlxalq Türk mədəniyyəti Təşkilatına (TÜRKSOY) üzv ölkələrin Mədəniyyət Nazirlərinin Daimi Şurasının növbədənkənar iclasında Azərbaycanın mədəniyyət paytaxtı Şuşa şəhəri 2023-cü il üçün “Türk dünyasının mədəniyyət paytaxtı” elan edilmişdir. “Türk dünyasının mədəniyyət paytaxtı” layihəsinin əsası 2010-cu ildə türkdilli ölkə başçılarının İstanbul şəhərində keçirilən 10-cu sammitində qoyulub. Qərara əsasən, Türk dünyasından hər il bir şəhər “mədəniyyət paytaxtı” elan edilir.
Şuşa Türk dünyasından bu missiyanı yerinə yetirən 11-ci şəhərdir.
Memarlıq və şəhərsalma sənətinin 270 illik tarixə malik parlaq incisi olan və Azərbaycan xalqı üçün yüksək mədəni-mənəvi dəyər kəsb edən Şuşaya xüsusi ehtiramın təzahürü kimi bu qərar bütün türk dünyasının birlik və həmrəyliyinin yeni rəmzinə çevrilməklə, türk xalqları arasında əməkdaşlıq perspektivlərinin daha da genişləndirilməsi işinə öz töhfəsini verəcəkdir.
Bütün bunları nəzərə alaraq F.Köçərli adına Respublika Uşaq Kitabxanasının Ölkəşünaslıq və milli ədəbiyyatın təbliği şöbəsi “Şuşa – Türk dünyasının mədəniyyət paytaxtı” adlı tövsiyə biblioqrafiyası hazırlamışdır.
Geniş oxucu kütləsi üçün nəzərdə tutulan tövsiyə göstəricisinə 57 adda ədəbiyyat daxil edilmişdir. Bunlardan 51-i tammətnlidir. 2004-2023-cü illəri əhatə edən ədəbiyyat iki dildə Azərbaycan və rus dillərindədir. Girişdə mövzu haqqında ətraflı məlumat verilmişdir.
Aşağıda qeyd olunan link vasitəsilə tövsiyə göstəricisi ilə tanış ola bilərsiniz.
