F.Köçərli adına Respublika Uşaq Kitabxanası kitabxananın yeni loqotipi və saytda olan yeniliklərlə bağlı təqdimat etdi.

Təqdimatda C.Cabbarlı adına Respublika Gənclər Kitabxanasının əməkdaşları və fəal oxucular iştirak edirdi. Təqdimatı giriş sözü ilə açan Respublika Uşaq Kitabxanasının direktoru, Əməkdar mədəniyyət işçisi Şəhla Qəmbərova çıxışında qeyd etdi ki, kitabxananın yenilənmiş saytı və loqotipi müasir texnologiyaların sürətlə inkişaf etdiyi dövrdə istifadəçilərin tələblərinə uyğundur. Yenilənmiş sayt istifadədə daha sadə, rahat, əlçatan, yeni materiallarla zənginləşdirilmiş və xüsusi məna kəsb edən tərtibatla yığılmışdır. Manşetdə Xarıbülbülün rəngləri və F.Köçərlinin şəkli öz əksini tapır. Həmçinin, ilk dəfə olaraq saytda məhdudiyyətli uşaqlar üçün bölmə yaradılıb. Səsli resurslar sağlamlıq imkanları məhdud uşaqlarla yanaşı digər istifadəçilər üçün də açıq bir resursdur. Məqsəd sağlamlıq imkanları məhdud uşaqlara kitabxana xidməti göstərmək, onların sosial mühitə inteqrasiyasını təmin etməkdir. Yeni saytın mobil tətbiqi də yaradılıb. Ş.Qəmbərova yüksək peşəkarlıq və həssaslıqla hazırlanan yeni saytın istifadəçilərə daha faydalı olacağını vurğuladı.

Daha sonra kitabxananın əməkdaşı Aqil Tağıyev sayt haqqında ətraflı məlumat verdi.

O, qeyd etdi ki, "Tarixdə bu gün" adlı yeni bölmədə əlamətdar günlər öz əksini tapır. Multimedia bölməsində isə 300-dən çox uşaq mahnıları, səsli nağıllar, hekayələr, uşaq lətifələri, cizgi filmləri, səsli kitablar, dərsliklər həm PDF, həm də səsli formatda yerləşdirilib. 

Yenilənmiş saytda oxucuların kitabxanaya abunə olmaq imkanları da var. Bunun üçün saytda poçt ünvanlarını qeyd etmək kifayət edir. Ən başlıca yeniliklərdən biri də kitabxananın oxuculara toplu mesaj göndərməsidir. Belə ki, kitabxanaya daxil olan yeni kitablar, tədbirlər, elanlar haqqında məlumatlar oxuculara eyni vaxtda ötürülə bilər. Sayt hazırda Azərbaycan dilində, yaxın günlərdə isə rus və ingilis dillərində istifadəyə veriləcək. Həmçinin, yenilənmiş sayt Google Play vasitəsi ilə mobil telefonlara yüklənir.

Sayt SSL sertifikatı ilə mühafizə olunur.