Mütaliə hər bir insanın şəxsiyyət kimi formalaşmasında böyük rol oynayır. İnsan mütaliə edərək öz dünyagörüşünü, biliklərini, həyat təcrübəsini, nitq qabiliyyətini artırır, mənəviyyatını zənginləşdirir.

F.Köçərli adına Respublika Uşaq kitabxanasının avqust ayında “Zabitlər bağı”nda fəaliyyətə başlayan “Yay oxu zalı” artıq çoxlu sayda oxucuya xidmət edir. Oxu zalı açıq havada fəaliyyət göstərir. Bununla da geniş oxucu kütləsinin mütaliəyə cəlb edilməsinə tez bir zamanda nail olunub. Açıq oxu zalında, kitabxana daxilində olduğu kimi oxuculara hər dildə, hər janrda və tipdə ədəbiyyat təqdim olunur. Yay oxu zalının parklarda təşkil olunmasına ən çox sevinən, sözsüz ki, balacalardır, çünki parklara gəzintiyə çıxan uşaqlar rəngli, əlvan şəkilli, nəfis tərtibatlı kitab və jurnalları gördükdə çox sevinirlər. Onların sevincinə yaşlı nəsil oxucularımız da qoşulur. Qeyd edək ki, 2010-cu ildən başlayaraq hər il davam edən bu layihəni həyata keçirməkdə kitabxananın əsas məqsədi uşaqların mütaliə aləmini zənginləşdirmək, dünyagörüşünü artırmaq, onların vətənə layiqli vətəndaş kimi yetişməsinə yaxından kömək göstərməkdir. Bu tədbiri təşkil etməklə F.Köçərli adına Respublika Uşaq Kitabxanası uşaqlarla yanaşı böyüklərin də mütaliəsini nəzərə alıb. Yay oxu zalı 15 sentyabr tarixinə qədər davam edəcəkdir.