17 may 2018-ci il tarixində, F.Köçərli adına Respublika Uşaq Kitabxanasının təşkilatçılığı ilə 3 nömrəli Uşaq-Gənclər İnkişaf Mərkəzində Misirin böyük alimi, uşaq yazarı, 400-dən çox kitabın müəllifi Yaqub Əl Şaruni ilə uşaqların görüşü oldu. Misir Mədəniyyət və Təhsil Əlaqələri Mərkəzinin rəhbəri Əhməd Sami Elaydi, müəssisənin direktoru Qəti Lalə, kitabxananın direktoru Şəhla Qəmbərova və pr.Yaqub Əl Şaruni ilə dəyirmi masa arxasında tanışlıq oldu. Qarşılıqlı disskusiya zamanı Misir- Azərbaycan təhsil və mədəni əlaqələrindən geniş söhbət açıldı. Sonra mərkəzin direktoru Qəti Lalə qonaqlara fəaliyyət istiqamətləri barədə ətraflı məlumat verdi. Qonaqlar mərkəzdə, uşaqlar üçün yaradılan şəraitlə tanış oldular. Uşaqların əl işlərindən ibarət rəsmlərin olduğu guşə Misirli qonaqları bir daha valeh etdi. Sonda, xatirə şəkilləri çəkildi.
Həmin gün qonaqlar, Cəfər Cabbarlı adına Respublika Gənclər Kitabxanasında oldular. Gənclər kitabxanasının direktoru Tahir Sadıqov qonaqları kitabxana əməkdaşlarına və orada təcrübə keçən tələbələrə təqdim etdi. Görüş zamanı, professor Yaqub Əl Şaruni Misir uşaq ədəbiyyatından və müəllifi olduğu kitabları haqqında maraqla danışdı. Sonda, xatirə şəkilləri çəkildi.
“Misir Uşaq Ədəbiyyatı” həftəsi çərçivəsində keçirilən silsilə tədbirlərin sonuncu ünvanı Xəzər Universiteti Dünya Məktəbi Təhsil Kompleksi oldu. Məktəbin kitabxanasında, şagirdlərlə Misirli qonaqlar arasında maraqlı görüş keçirildi. Tədbirdə, Misir yazarı Yaqub Əl Şaruni uşaqlara “Tülkü və Canavar”, ”Hədiyyə” adlı nağıllarının qısa məzmununu həvəslə danışdı. Uşaqlar onları maraqlandıran suallarla müraciət etdilər və aldıqları cavablardan çox məmnun qaldılar. Sonda “Misir Uşaq Ədəbiyyatı” həftəsi çərçivəsində, keçirilən bütün tədbirlərdən və görüşlərdən məmnun qalan yazıçı, alim bu təəsüratlarının Misirdə hər gün bir milyon tirajla nəşr olunan Əl Əhram qəzetində işıqlandıracağını bildirdi və xüsusilə qeyd etdi ki, Azərbaycanda uşaqların təhsil və təhsildən kənar tədris müəssisələrində onların inkişafı üçün çox uğurlu layihələr həyata keçirilir. Bu da, öz növbəsində bugünkü uşaq və yeniyetmələrin gələcəyi naminə sağlam və savadlı böyüməsi üçün zəmin yaradır. Görüş, uşaqlarla Misirin böyük alimi, uşaq yazarı, Yaqub Əl Şaruninin xatirə şəkillərinin çəkilişi ilə başa çatdı.
