26 sentyabr 2017-ci il tarixində Misir Milli Kitabxanasının və Arxivlərinin müdiri dr.Əhməd Seyyid Muhəmməd Şövki F.Köçərli adına Respublika Uşaq Kitabxanasının qonağı oldu. Kitabxana ilə tanışlıqdan sonra “Azərkitab” kitab mərkəzində F.Köçərli adına Respublika Uşaq Kitabxanasının təşkilatçılığı ilə Misir Mədəniyyət və Təhsil Əlaqələri Mərkəzinin birgə layihəsi olan “Qədim Misir nağılları kiçik yaşlı Azərbaycan rəssamlarının gözü ilə” adlı rəsm sərgisinin təqdimatı keçirildi. Təqdimatdan sonra görüş Mərkəzin konfrans zalında davam etdi. Görüşü F. Köçərli adına Respublika Uşaq Kitabxanasının direktoru, əməkdar mədəniyyət işçisi Şəhla Qəmbərova açaraq tədbirdə iştirak edən qonaqları və gənc rəssamları salamladı. O, öz çıxışında qədim Misir və Azərbaycan folkloru, nağılları haqqında ətraflı məlumat verdi. Sonra isə söz Misir Təhsil və Mədəniyyət Əlaqələri Mərkəzinin rəhbəri dr. Əhməd Sami Əl-Aydiyə verildi. Mərkəzin rəhbəri öz çıxışında bu layihənin Misir və Azərbaycan uşaqları üçün çox önəm daşıdığını söylədi. Tədbirdə uşaq yazarlarından Sevinc Nuruqızı, Elvira Məmmədli, OMBUDSMAN-nın nümayəndəsi və s. qonaqlar iştirak edirdi. Sonda söz Misir Milli Kitabxanasının və Arxivlərinin müdiri, Ayn-Şəms Universiteti - Ədəbiyyat fakültəsi - Arxeologiya kafedrası - İslam Arxeologiya Şöbəsinin dosenti dr. Əhməd Seyyid Muhəmməd Şövkiyə verildi. Misirli qonaq balaca rəssamları, qonaqları salamladıqdan sonra “Ələddinin sehrli köynəyi” nağılı əsasında Qahirə-İslam İncəsənəti Muzeyi haqqında geniş məlumat verdi. Təqdim olan mühazirədən belə bir nəticə çıxarmaq olar ki, elm bütün sehr və sirlərin açarıdır. “İslam Həmrəyliyi İli” çərçivəsində keçirilən tədbirin əsas məqsədi uşaqlarımızı gələcəyimiz naminə düzgün maarifləndirmək, uşaqların dünya ədəbiyyatına, folkloruna, nağıllarına və mütaliəyə olan maraqlarını artırmaq, onları antik mədəniyyətlərin beşiyi, sivilizasiyanın mərkəzi hesab edilən qədim tarixə, ədəbiyyata, incəsənətə, elmə sahib olan fərqli bir mədəniyyətlə tanış etmək, ecazkar Misir nağıllarını oxuyan və bu nağıllara illustrasiyalar çəkən azyaşlı oxucularımıza dəyər verməklə qiymətləndirməkdir.