Yanvarın 21-də Nərimanov rayonunda yerləşən 36 saylı məktəbdə “And yerimiz Şəhidlər xiyabanı” adlı tədbir keçirildi. Tədbirdə xalqımızın ümummilli lideri Heydər Əliyevin və ölkəmizin suverenliyi, ərazi bütövlüyü uğrunda şəhid olanların xatirəsi bir dəqiqəlik sükutla yad edildikdən sonra, Azərbaycan Respublikasının Dövlət himni səsləndi. Ədəbi-bədii kompozisiyada vətənin süverenliyi, azadlığı və ərazi bütövlüyü uğrunda şəhid olanlar yad edilərək şeirlər söyləndi, mahnılar ifa olundu. Tədbirdə çıxış edən kitabxananın direktor müavini məktəblilərin hərbi vətənpərvərlik ruhunda tərbiyə olunmasında belə tədbirlərin əhəmiyyətindən söz açdı, bildirdi ki, 1990-cı il 20 yanvar Azərbaycan tarixinə həm faciə, həm də xalqımızın qəhrəmanlıq salnaməsi, qürur günü kimi daxil olub. 20 yanvar  gecəsi şəhidlik zirvəsinə ucalan Vətən övladları bir daha sübut etdilər ki, Azərbaycan xalqı yenilməzdir, azadlıq, müstəqillik yolundan onu heç bir qüvvə döndərə bilməz. 20 Yanvar faciəsindən 29 il ötür. Ancaq qədirbilən xalqımız həmin günün dəhşətlərini yaddan çıxarmır, azadlıq mücadiləsində canından keçən şəhidlərimizi böyük ehtiramla yad edir.  Tədbirin sonunda məktəbin tədris hissə müdiri tədbirin təşkili və mükəmməl ədəbi-bədii kompozisiyanın ssenarisi üçün kitabxananın xidmət şöbəsinin əməkdaşlarına öz təşəkkürünü bildirdi. Tədbirdən sonra şagirdlər 20 yanvar Matəm gününə həsr olunmuş kitab, rəsm sərgisi və foto stendlə tanış oldular.