Kitabxana 1889 – cu ildə Bakı şəhər Duması tərəfindən yaradılmış və Şəhər Dumasının qərarı ilə kitabxanaya rus tənqidçisi V. Q. Belinskinin adı verilir. 1918 - ci ildə Bakı Xalq Maarif Şöbəsi yanında 226960 nüsxə kitab fonduna malik kitabxana fəaliyyət göstərirdi ki, bunlardan biri də Belinski adına kitabxana idi və o zaman “ Belinski adına III Sovet kitabxanası” adlanırdı. Sonralar kitabxananın maliyyə çətinliklərini aradan qaldırmaq üçün kitabxana Maarif Komisarlığının tabeliyindən çıxarılıb, Mədəniyyət İdarəsinə tabe edilmişdir. Mədəniyyət İdarəsinin tabeliyində kitabxana şəhərdə olan uşaq kitabxanalarına rəhbərlik edirdi. 1965-ci ildə kitabxanaya Mərkəzi Şəhər Uşaq Kitabxanası statusu verilmişdir.

1991 – ci ilin may ayından etibarən Nazirlər Kabinetinin qərarı ilə kitabxanaya görkəmli uşaq şairi Mirmehdi Seyidzadənin adı verilmişdir.

“Azərbaycan Respublikasında Kitabxana - informasiya sahəsinin 2008 – 2013 – cü illərdə inkişafı üzrə Dövlət Proqramı”na əsasən, 2009 – cu il 16 Yanvar tarixində Azərbaycan Respublikası Mədəniyyət və Turizm Nazirliyinin təşəbbüsü ilə “Azərbaycanda ilk layihə” başlığı altında M. Seyidzadə adına Mərkəzi şəhər Uşaq Kitabxanasının nəzdində Uşaq İnformasiya Mərkəzi – Kitab mağazası fəaliyyətə başlayıb.

1999 – cu ildə “SOROS” ASİ – tu tərəfindən təşkil edilmiş müsabiqədə “Uşaq aləmi” Mədəniyyət Mərkəzinin yaradılması layihəsi ilə qalib çıxaraq, qranta sahib olmuşdur.

2000 – ci ildə “SOROS” ASİ – tu tərəfindən keçirilmiş II müsabiqədə iştirak edərək qrant almışdır. Bu müsabiqədə kitabxananın internet səhifəsinin açılması, uşaq kitabxanasını və kitabxanaya daxil edilmiş yeni uşaq ədəbiyyatını respublikamızın daxilində deyil, xaricində belə tanıtmaq idi.